【Emily】話未被要求助查 容海恩：各案唔同冇不公

【明報專訊】警方國安處本月初公布懸紅通緝8名身處海外並涉干犯《港區國安法》嘅港人，包括前香港眾志創黨主席羅冠聰、新民黨議員容海恩嘅家翁袁弓夷。國安處前日帶走羅冠聰父母及兄長到警署錄口供，容海恩噚日話未被要求協助調查，唔認為警方做事不公。

容海恩多次表明已經同袁弓夷脫離關係；羅冠聰早於3年前離港時表明與在港家人斷絕關係，其家人則被國安處帶走調查。容海恩噚日接受電視訪問，話自己未受調查，相信每宗涉及國安法被拘捕者或接受調查者都唔同，包括牽涉嘅程度及犯罪意圖，認為警方搵邊個調查有其考慮，並會按每宗案件決定係咪安排問話、搜屋等調查程序；佢又話若需要協助調查，自己從事法律行業會識得點應對。

警方國安處月初發出懸紅通緝，8人分別為任建峰、袁弓夷、郭鳳儀、郭榮鏗、許智峯、蒙兆達、劉祖廸、羅冠聰；各懸紅100萬元。容海恩喺警方發出懸紅通緝後，話希望袁弓夷能盡快回港自首。