【Emily】主持會議再「閉目」 馬逢國：瞓得差

【明報專訊】立法會噚日下晝審議提高亂拋垃圾同店舖阻街等罪行罰則，新思維議員狄志遠發言後，暫代主席嘅內會副主席馬逢國一度閉目養神，會議廳靜咗約6秒，其間秘書喺咪後輕聲提醒幾句「主席、主席」後，馬逢國先叫下一名議員發言。佢會後解釋前一晚瞓得唔好，強調無瞓着，「我其實係醒嘅，佢一講我已經即刻噏得出個名」。

馬逢國話前一晚瞓得唔好，凌晨醒咗3、4次，加上噚日比較遲食晏，有啲飯氣攻心，但強調瞇埋眼只係「一兩秒嘅事」，「我其實係醒嘅，佢一講我已經即刻噏得出個名。其實係瞇埋隻眼，真係唔係瞓着」。佢話日後開會前會盡量瞓好啲，或者食「刺激啲嘅食物」保持精神。

Emily睇番資料，去年底馬逢國主持會議期間曾「釣魚」，佢當時亦解釋自己唔夠瞓。