【Emily】「港式奶茶技藝」特別郵票7．25售

【明報專訊】香港郵政噚日宣布推出以「港式奶茶製作技藝」為題嘅特別郵票同相關郵品，包括一套4枚郵票、兩張郵票小型張同相關嘅集郵品，希望宣揚港式奶茶呢種非物質文化遺產。全線郵政局及「郵購網」今日開始先發售首日封，而呢個系列嘅特別郵票同相關郵品就要本月25號（周二）開始先有得買。

港式奶茶係由英式奶茶經百年演變而成，因為用嚟隔走茶渣嘅白布袋重複使用後染咗茶漬變啡色，就好似絲襪咁，所以又叫做「絲襪奶茶」。港式奶茶嘅製作技藝喺2017年成為首批列入「香港非物質文化遺產代表作名錄」嘅項目。