【Emily】調查：三成學生連打5個鐘機 最嚴重60小時

【明報專訊】暑假又嚟，唔少青少年都會打機度日。港專聯同中大嘅研究發現，31.8%受訪中小學生會連續玩網絡遊戲5個鐘或以上，個別嚴重個案仲狂打機60個鐘；42%受訪學生表示曾連續睇片5個鐘或以上，最嚴重者更狂睇90個鐘，而中學生同小學生嘅情况差唔多。

調查機構上年6月至12月向6間小學、4間中學做研究，共訪問2770個學生。調查發現，分別有約一半及以上學生，有中度至非常嚴重程度嘅抑鬱、焦慮症狀，同埋壓力水平。

港專應用社會科學系助理教授謝家和話，疫情時學生改上網課，令上網時間大增，亦容易依賴網絡遊戲，影響身體、精神、社交、學業。佢仲話有個案放假時「飯都唔食、涼都唔冲」連續打機十幾個鐘，建議家長同子女協商暑期作息時間表，減少拗撬，家長亦應以身作則，減少非必要咁用電子產品。