【Emily】中電推預測系統助修樹 免危及電纜

【明報專訊】中電舊年4月起啟用全港首個農林管理預測系統，結合地理資訊系統技術，記錄架空電纜範圍內超過17萬棵樹嘅資料同預測樹嘅生長，及早識別同修剪有潛在風險嘅樹，過去一年已做咗8萬次修剪，提升供電穩定同農林管理效益，每年因此可慳到150萬元嘅成本開支。

中電輸電及供電業務部北區總監劉浩然話，過往只靠雷達同無人機再加人眼監察樹木，?家個系統就可以估算樹木同附近架空電纜嘅距離，搵出有潛在風險嘅樹，再制定合適措施，例如修剪距離電纜好近嘅樹，或者停電去移走跌落電纜上嘅斷枝。

教大地理及環境科學研究講座教授詹志勇接受邀請，花一年蒐集樹木數據，從10個較普及樹種各揀8棵樹做研究，每棵修剪3條樹枝，每星期檢查水橫枝嘅生長，再據氣候條件，更準確客觀咁決定修樹方法。佢話中電團隊經驗豐富，但利用數學模型預測樹木生長速度，修剪就更事半功倍。

中電修樹隊成員劉威隆話架空電纜通常喺山上面，每次修樹都要帶好多裝備，如果事先知道樹木嘅資料，喺準備人手同裝備上有好大幫助，員工亦會學到正確嘅修樹方法。