【Emily】將升樞機周守仁：盼犯事青年重拾前途

【明報專訊】天主教香港教區主教周守仁獲教宗方濟各擢升為樞機，成為香港第四名樞機。周守仁噚日回應任命時話，知道消息初時感難以置信，甚至以為自己「聽錯」。佢話成為樞機係新使命，感到一份責任感。周守仁曾經話過希望政府寬宏處理反修例事件中罪行較輕者，佢噚日重申，希望曾犯事嘅年輕人可以重拾前途，認為畀年輕人更多希望十分重要。

指梵蒂岡知港政治、宗教狀况 「唔一定要好公開做」

周守仁話未計劃未來工作，要等教宗係咪有其他委派，但?家仍係香港教區主教，會留港服務。佢話希望未來可以協助香港「修和」，令香港人可以休息、平靜落嚟，「呢個當然好多方面要配合，不過我相信歷史嘅主宰會幫我哋，只要我哋心向呢樣嘢就得」。佢提到，已同宗座署理湯漢樞機見面，對方送上祝賀。另外，被問到會唔會向梵蒂岡反映香港同內地嘅政治、宗教狀况，佢話梵蒂岡知道有關情况，會透過唔同方面處理，「唔一定要好公開去做嘅」。

教宗方濟各前日宣布任命21名主教及總主教為樞機，擢升儀式9月30日喺梵蒂岡舉行。本港歷來有4位樞機，包括已故嘅胡振中，仲有陳日君、湯漢。周守仁喺晉牧為主教後不足兩年即獲擢升，新任命意味佢將有資格參與閉門選出下任教宗。