【Emily】建新大樓逾10年未成事 丘應樺：一直研究緊 議員倡將軍澳「傳媒廠房」撥港台

【明報專訊】港台曾經喺2013年向立法會申請興建新廣播大樓，最終遭否決，事隔咁多年，新大樓仲係「十畫都未有一撇」。噚日立法會資訊科技及廣播事務委員會討論港台嘅工作同最新發展，唔少議員關注新大樓嘅進度，認為?家嘅大樓比較舊，打風落雨仲會滲水，希望可以改善工作環境。其中自由黨李鎮強建議咗幾個新地點，包括喺將軍澳工業邨政府已收番嘅「傳媒廠房」、元朗新田一帶，又或北部都會區。

港台公僕缺員兩成 擬赴內地聘港生

商經局長丘應樺回應話一直研究緊新大樓嘅事，亦同港台研究緊進度，希望有具體計劃嘅時候同立法會交代。

另外，勞聯林振昇提到港台嘅人手編制約有735個公務員，但?家只得596人，空缺有139個，對比起其他政府部門，港台嘅空缺比例較高，關注會唔會影響運作。廣播處長張國財回應話，?家港台公務員職位有兩成空缺，已經開始咗幾輪招聘，請咗156個非公務員合約員工，同埋透過經貿辦喺有香港學生留學嘅地方宣傳，仲計劃會去內地，喺比較多香港學生讀傳理系嘅大學招聘。

唔少議員也為港台提建議，包括重播香港足球賽事、喺部分社交媒體開帳號、同內地傳媒機構合作等。