【Emily】殘疾運動員攝影展 田二少捕獲蘇樺偉

【明報專訊】實政圓桌立法會議員田北辰日前出席一個以殘疾運動員為主題嘅慈善攝影展，並把握機會同殘奧田徑金牌得主、「神奇小子」蘇樺偉合照。田二少形容蘇樺偉係佢偶像，指出殘疾運動員所需資金同資源多過健全運動員，但政府同社會嘅支援反而較少，希望今次活動能令更多人了解殘疾運動員嘅需要。

盼更多人了解殘疾運動員需要

山頂廣場本周舉行「李卓妍個人慈善影展」，展出40幅主要以殘疾運動員為題材嘅相片，並為香港殘疾運動員及特殊奧運會籌款，其中田北辰獲邀與蘇樺偉、港協暨奧委會副會長胡曉明等一同主持開幕儀式。

田北辰喺facebook話，好高興獲邀出席開幕禮，話展覽係高球波友嘅囡囡攝影作品。佢支持朋友之外，有機會到場與殘疾運動員見面打氣，見到蘇樺偉時更即刻邀請對方合照。佢話蘇樺偉嘅故事令佢感動，形容對方係佢偶像，亦令佢認為體育提供機會予殘疾人士發掘無限可能、展現才能，係好重要嘅平台。田北辰希望今次攝影展唔單止係一次籌款活動，更可以成為有延續性嘅平台，畀更多人了解殘疾運動員需要。