【Emily】周守仁擢升樞機 有資格選教宗

【明報專訊】教宗方濟各噚日喺梵蒂岡宣布，擢升包括天主教香港教區主教周守仁（圖）在內嘅21名神職人員為樞機，令周守仁成為香港第四位樞機。新任命同時意味住，63歲嘅周主教日後將有資格參與選出下任教宗，直至佢80歲為止。目前兩名香港嘅樞機陳日君同湯漢都年逾80，按規定唔可以參與閉門選舉過程，但可參與選前嘅討論。

回歸後升得最快嘅樞機

據外電統計，超過137名來自世界各地樞機有資格選下任教宗，當中約七成係方濟各挑選，令外界觀望繼任人會否延續方濟各較開放嘅路線。

翻查資料，周守仁係回歸以來升得最快嘅樞機，由2021年12月正式晉牧為主教到今年9月底樞機團正式擢升，中間未夠兩年。陳日君樞機2002年9月正式擔任天主教香港教區主教，3年半後、2006年3月擢升樞機；湯漢樞機2009年4月出任主教，兩年10個月後、2012年2月擢升樞機。香港首位樞機為已故嘅胡振中，佢1975年就任主教，1988年獲任命為樞機。

周守仁透過教區回應話，懇請信眾繼續為佢同教區祈禱。