【Emily】海園「夏水禮」重辦 搞Emoji主題活動

【明報專訊】海洋公園因新冠疫情停辦3年嘅「夏水禮」，將於本月8日起至8月27日重辦，園方除咗會舉辦一系列活動外，喺疫情期間開幕嘅水上樂園亦會以「Emoji」（表情圖案）為主題辦主題活動。海洋公園會推出夏日優惠門票，即日起至8月27日發售，成人388元、小童233元，門票有效期至9月30日。

海洋公園方面，山下嘅海濱樂園嘅活動有室內水槍大戰、泡泡派對等，門口會有高3米嘅「Emoji」主題裝飾畀市民打卡。海洋公園主席龐建貽話，夏水禮係海洋公園最受歡迎嘅體驗之一，公園早前亦邀請一班有特殊教育需要嘅學員，參與製作今次活動其中一幅特色塗鴉牆，又會同港大香港賽馬會防止自殺研究中心及其他機構合作，推廣情緒健康同邀請弱勢社群參加夏水禮。