【Emily】上蓋組件「游抵」啟德體育園 萬噸鋼材 電腦模擬搬入地盤路線

【明報專訊】啟德體育園預計最快2024年底啟用，主場館嘅大型開合式上蓋嘅預製鋼構件噚日全部運到香港，體育園形容，今次標誌住主場館嘅上蓋工程踏入咗關鍵階段。主場館上蓋同主鋼桁由1.5萬噸鋼材組成，其主鋼桁架跨度180米；東西兩邊嘅開合式上蓋則重逾4800噸，所以單係運輸、組裝工序都唔簡單。

相關嘅組件喺中山同東莞生產後，分成8組由水路運抵香港。協興工程項目經理鍾展煒話，組件從東莞嘅碼頭運嚟香港，途經屯門、維港，再去到啟德體育園對出嘅臨時碼頭，但原來由碼頭運入工地都要3至4個鐘。鍾展煒提到，事前用過電腦技術模擬運送路程，包括點樣轉入彎位到地盤等。

能夠順利運入地盤後，下一關就係裝嵌。項目團隊會用到「超大型構件液壓提升技術」，將開合式上蓋嘅構件，一次過吊升到預設位置，組裝完成後，整個開合頂蓋重量有2400噸，然後逐步連接端部構件（end segment）、放上路軌車、再接駁到開合式頂蓋嘅驅動系統，最後通過驗收同試運，就可順利用於舉辦2025年全運會嘅部分賽事。