【Emily】田北辰倡高球場全改公用 甯漢豪：無迫切需要

【明報專訊】政府將收回部分粉嶺高爾夫球場嘅討論，近月鬧得熱哄哄，噚日實政圓桌議員田北辰喺立法會提出口頭質詢，問政府有冇研究收回整個粉嶺高球場後，改為公眾高球場，惠及普羅市民。發展局長甯漢豪回應時，立場仍舊堅定，話?家無迫切需要增設一個公眾高球場。

田北辰話，現屆政府早前表明已覓得嘅土地可興建36萬個單位，收回高球場後只興建到1.2萬個單位，認為香港應有多一個公眾高球場。但甯漢豪話，只要條件許可，應興建高於需求嘅房屋供應量，作為緩衝空間，又話喺收回高球場現址建屋嘅部分係政府土地，亦不涉及清拆安置問題，時間上會有優勢，強調唔會放棄任何一個建屋項目。

睇番資料，田北辰喺上屆政府推出土地供應專責小組嘅報告時，係同意報告建議局部發展高球場。但田北辰噚日同Emily講，新一屆政府有新發展，自然有唔同睇法，認為與其政府收番土地後，大部分係開放畀公眾散步，不如收回成個高球場，改做公眾高球場。