【Emily】做兩份兼職 尚海龍：80%時間放立會

【明報專訊】參選時為商湯科技香港公司總經理嘅立法會選委界別議員尚海龍（圖），原來近日又有新動向，Emily最近翻查立法會議員個人利益登記冊，發現尚海龍喺上月1日登記咗自己係中國移動香港有限公司首席顧問。佢噚日同Emily解釋，話自己冇辭任商湯嘅職務，而係轉咗做商湯集團戰略顧問，同時佢最近因為同中移動有聯絡、合作關係，故以兼職形式做顧問。

現為商湯中移動顧問

同時做兩份兼職，會唔會影響立法會嘅工作？尚海龍話，自己有超過80%時間投放喺立法會工作，而做顧問唔使成日返辦公室，所以主要時間都放喺立法會。佢仲提到，自己以前都係中移動員工，本身同中移動有好緊密接觸，做議員後同以往嘅管理層、領導有溝通都好正常；佢透露，嚟緊會有公益活動籌劃，需要各界支持同埋資源，所以就有同以前工作嘅管理層聯繫。

至於係咩活動？尚海龍就話未講得住，仲係準備階段，遲啲就會公布。