【Emily】議員為亞運港隊代表打氣 楊潤雄：所需資源立會都批

【明報專訊】杭州亞運會9月23日開幕，港隊預計派出860多名運動員參賽，係歷屆亞運最大規模。立法會議員噚日為香港代表團打氣，文化體育及旅遊局長楊潤雄亦出席為健兒加油，楊潤雄話，亞運會期間有免費電視直播，希望市民一齊支持港隊運動員。佢仲話立法會一直好支持體育界，每逢運動員出外比賽，所需要嘅資源立法會都會批。

香港單車隊前代表黃金寶、空手道港隊前代表李嘉維都有出席為代表團打氣。

港隊吉祥物、黃金色嘅獅子「堅仔」亦嚟咗，立法會主席梁君彥形容「堅仔」與生俱來擁有「獅子山精神」，象徵港人「勇猛、硬淨」，亦寓意香港運動員「好堅」。黃金寶話，亞運會對香港運動員係亞洲第一個大舞台，希望佢哋到時獲得嘅獎牌同「堅仔」一樣顏色。