經濟
星品牌Tea WG 將加速拓港分店
【明報專訊】新加坡奢華茗茶品牌Tea WG一直受港人歡迎，成日門口大排長龍。不過以後情况可能大有改善，事關Tea WG創辦人Taha Bouqdib話，想擴充香港分店，由現時9間分店，到2024年加速拓展至全港超過15間分店，今個夏天仲會繼續擴展，相信好快有新分店嘅消息啦。
小琴記得十年前Tea WG首次攻港就落戶中環國際金融中心（IFC），走精品奢華路線，金碧輝煌嘅外表令人印象深刻。近期呢間精品店已經翻新重開，更加入茗茶外賣概念，有超過100款茗茶外賣可供選擇，冷熱均可，款式數量為全港最多。
而且Tea WG仲喺今年5月於香港推出超現代全球全方位電商平台及邀請制會員計劃「MyTWG」，會員等級分為兩級：翡翠會員和黃金會員，呢個計劃係新加坡推出後現已拓展至法國、阿聯酋及台灣市場，相信Tea WG粉絲去到世界各地都可以享用優質茗茶啦。
