海通國際巨虧兼供股後 委新聯席CEO

【明報專訊】海通國際（0665）喺2022年度因為投資失利損手，破紀錄輸咗65.4億元，之後宣布供股向股東伸手板攞近13億銀，人事變動亦緊接而嚟。繼較早前副主席李建國同執行董事潘慕堯相繼話，唔會喺股東大會時連任。最新一幕，由噚日起，董事會向股東提出委任宋世浩為執行董事，亦委任佢做聯席行政總裁。宋世浩會同現任副主席、行政總裁兼執行董事林涌，共同肩負職責和決策。

宋世浩喺2000年加入海通證券，出任唔同職位，喺佢接手海通國際嘅工作前，佢做過海通證券證券金融部總經理、集團嘅控股股東海通國際控股董事長，銜頭一大堆。至於林涌方面，較早前喺股東會獲重選，佢同海通國嘅服務協議去到2024年12月22號，佢若要走，起碼要提前3個月通知。一時輸錢，又一時集資，仲有高層變動搞到似走馬燈咁，難怪近期變動頻頻嘅海通國際，引起市場矚目！

[小琴密語]