【Emily】未有政治庇護 鄭家朗申BNO簽證遭拒

【明報專訊】前香港眾志副主席鄭家朗（圖）上年已經離港，?家身處英國，噚日佢喺facebook話自己可能冇得留喺英國，事關佢嘅英國國民（海外）（BNO）簽證申請已被拒絕。佢並話自己去咗英國都一年半，申請咗政治庇護，但仲未有面試。

鄭家朗拍片解釋，話自己係1997年之後先出世，所以等到上年底，英國政府宣布可以畀1997年後出世嘅港人申請BNO簽證先去申請，但3個月內都未有回覆。點知有一日佢突然收到政府電郵，話BNO簽證不獲批。

鄭家朗嘅情况並非單一例子，之前英國都有過類似個案報道。根據鄭家朗喺影片展示嘅電郵節錄，提到佢上年2月入境英國時申請咗政治庇護，?家係移民保釋（Immigration bail）期間，而移民保釋緊嘅人係唔可以申請BNO簽證。佢亦解釋，即使取消政治庇護申請，都唔可以申請BNO簽證，因為會變咗逾期居留，?家要搵律師幫手處理，希望加快政治庇護申請，又話擔心唔知點算好。