【Emily】立會教師培訓日 梁君彥冀資訊帶返校園

【明報專訊】噚日立法會搞咗個「教師培訓日」，全港23間小學33名教師去到議事堂「受訓」，由立法會主席梁君彥介紹會議廳設施，同埋日常開會情况，並一齊食午飯交流。一班教師同議員交流唔同議題，例如青少年精神健康、青少年發展、教育開支與教育質素等。

兩名關注青年議題嘅選委界別議員梁毓偉同陸瀚民，就負責主持「議員對談」環節。梁毓偉話，特別關注STEAM教育、生涯規劃同國民教育，喺對談中，知道現場大多數教師教常識科，而小學推行嘅STEAM教育工作都落喺佢哋身上，但就面對不少問題，例如課時不足、文科出身嘅教師欠缺在職培訓等，大家亦交流咗STEAM應唔應該獨立成科嘅睇法。梁毓偉希望今次聽完意見後，有機會喺教育事務委員會向局方反映。

梁君彥就希望類似活動可令教師更深入認識立法會事務，將資訊帶返校園，幫到佢哋設計課程活動同教材，而議員透過對談亦更了解前線教師關注嘅問題。