經濟
攜程推10億生育補貼 員工每個BB獲5萬
【明報專訊】內地政府呢幾年積極推動生育率，就連攜程（9961）都出一分力！集團噚日宣布，今日起推出生育補貼政策「程二代程長禮金」，入職滿3年嘅全球員工，每生一個小朋友，每年可以獲得1萬元（人民幣，下同）補貼直到5歲，即係每個孩子最多可以獲得5萬元補貼。攜程預計，未來將會投入10億元生育補貼，即係大約有2萬個BB受惠。
老闆是人口經濟學家
雖然攜程同生育率好似唔太關事，但其實集團董事局主席梁建章另一個身分係人口經濟學家。梁建章就話，一直建議政府向有小朋友、尤其是有多個小朋友嘅家庭派錢，以降低家庭生育成本，幫助更多年輕人，完成生育多個孩子嘅願望。同時，企業都可以喺自身能力範圍內發揮作用，共同構建一個良好嘅生育氛圍。
梁建章又話，家庭財稅補貼應該係最先行措施，因為最容易實施同見效最快。根據資料，攜程推出生育補貼政策前，每年喺生育福利已經投入近800萬元，睇嚟梁建章喺人口問題上真係不遺餘力。
email: [email protected]
