【Emily】維園慶回歸 可試著華服 有人幫手化妝

【明報專訊】一連3日喺維園舉行嘅慶回歸活動噚日開幕，特別加入中華傳統文化元素、大灣區科技展同埋本地特色非物質文化遺產展。活動有3個中華文化展區，分別係陝西西安展區、遼寧展區、山東展區。陝西西安展區仲特別設有「華服體驗區」，提供近150套唐服，工作人員會協助市民著唐代服飾同化妝，現場都見到有市民身穿唐代服飾「自拍打卡」。

中華文化3展區：陝西遼寧山東

今次由香港各界慶典委員會舉辦嘅「慶祝香港回歸祖國26周年」慶祝活動，市民可以喺現場體驗中華傳統文化，共慶回歸。

場內遼寧展區有6個展館，以遼寧遼河歷史劃分史前文明、紅山文明、長城文化，參觀者可以了解遼寧省域今昔嘅科技及工業成就。山東展區就介紹衆多非物質文化遺產，包括萊州毛筆、葫蘆雕刻同東明舞獅等。場內亦特設兩個打卡區，其中一個係以香港本地特色大型花牌做背景，再配合26條傳統舞龍。

不過，由於天公不造美，噚日下午不時落雨，加上市民要返工，場內所見人流就唔多。