【Emily】獲委客座教授 張建宗羅致光 入嶺大老年學中心做教研

【明報專訊】政務司前司長張建宗同勞福局前局長羅致光離開「熱廚房」後，先後加入過港大做教學工作，嚟緊就再有新崗位。嶺大噚日宣布委任佢哋做客座教授，喺嶺大亞太老年學研究中心做教研工作。

嶺大話，張建宗將會喺中心參與教學，擔任健康及社會服務管理課程嘅客座教授，校方希望可以藉此啟發學生思維，同埋為中心嘅研究工作提供策略意見。嶺大引述張建宗話非常欣賞該校博雅教育嘅獨特宗旨，期望同學生互動，「坦誠分享近半世紀效力政府、竭誠服務香港嘅豐富及寶貴經驗，致力培育未來社會棟樑」。

前中策組王卓祺亦獲委任

至於羅致光，嶺大讚佢係港大資深學者，提到佢喺1993至1997年做過社工及社會行政學系主任。嶺大話佢會喺中心開展有助政策制定嘅實證研究，亦會為課程設計提供建議，校方希望佢「為嶺大學生同教職員提供富有洞察力嘅講學」。

嶺大同時委任前中央政策組全職顧問王卓祺，今日起擔任客座教授，協助中心開展與學術研究相關嘅工作。