【Emily】水上樂園辦「世界最大泳課」學防遇溺

【明報專訊】海洋公園水上樂園噚日端午節舉辦「世界最大游泳課」，近300名參加者喺樂園嘅天海灣，學習點樣換氣同掌握水中呼吸節奏等基本游泳技巧，水上樂園團隊並教參加者水中自救方法，包括發生事故時應採取咩行動、點樣呼叫救援等，希望加深佢哋對水上安全嘅認知。

籌辦活動嘅世界水上樂園協會引述世衛數據，推算溺水係全球意外致死嘅第三大原因，威脅公共健康，所以籌辦呢項全球活動，旨在推廣教導兒童習泳同預防遇溺嘅重要。

活動今年係第14屆，喺全球六大洲18個國家或地區逾600個水上樂園、水上中心同游泳學校舉行，噚日24個小時內，為兒童同家庭提供共逾2萬小時嘅水上安全訓練，而水上樂園係本港第一個主辦場地。