【Emily】「不可獨食」 鄧炳強請實習生嘗九黃糉

【明報專訊】噚日端午節，相信唔少人嘅早午晚餐都總會食糉。保安局長鄧炳強噚日就喺facebook提到，好多朋友知佢鍾意食鹹蛋黃，甚至有個老友每年端午節都會親手包幾隻「九黃鹹肉糉」畀佢。佢話繼中秋節請同事食「十黃月餅」後，今次再同一班千禧後嘅保安局實習生分享「九黃鹹肉糉」，形容係「少食多滋味」，亦係「不可獨食嘅傳統美食」。

鄧炳強親手切糉，話慶幸有一班實習生在場才能食晒。被問到「九黃鹹肉糉」有乜寓意，佢話係寓意長長久久。鄧炳強亦同實習生分享食糉喜好，問實習生鍾意食鹹肉糉、鹼水糉定係上海糉等「特別地區糉」，有3個人不約而同話鍾意食鹹肉糉，鄧再問係咪因為有鹹蛋黃同鹹肉，有實習生笑指因為「飽肚」，鄧就提醒大家「吃飽就要開工」。