【Emily】西九「紫荊花之夜」 千架無人機演繹端午

【明報專訊】噚日端午節，紫荊文化集團夜晚喺西九文化區藝術公園上空舉行「紫荊花之夜」無人機飛行表演，結合現代科技同傳統文化，透過繽紛燈光同澎湃音樂將節日意象呈現喺夜空，演出全長約15分鐘。1000架無人機排列出多個立體圖案，先後拼砌出「屈原像」、五彩線（端午節飾物）、艾草、巨龍等節日元素，其中屈原影像旁邊砌出其名作《離騷》中「路漫漫其修遠兮 吾將上下而求索」句子。

無人機又拼砌咗食糉、放風箏、爬龍舟等端午習俗，吸引唔少一家大細嚟觀賞。其中Emily覺得「巨龍吐珠」最有氣勢，由無人機組成一條巨龍，與維港景色互相輝映，現場有小朋友模仿巨龍擺動，十分投入。最後，表演用維港景色同「明日香港 一齊打拼」標語作結，祝福香港未來蓬勃發展、繁榮富強。