【Emily】國安處出特刊《護港》 表彰「階段性成果」

【明報專訊】《港區國安法》實施近3年，今年亦係警方國安處成立3周年，警方刊物《警聲》透露，為表彰同肯定警隊人員喺維護國家安全工作嘅艱辛努力兼取得嘅階段性成果，國安處將會出版紀念特刊《護港》，仲有實體版同電子版，Emily聽講特刊計劃本月底面世。

《警聲》提到，特刊主要分為4個章節，包括回顧香港遭「黑暴」嚴重破壞嘅經歷，其後國安法實施扭轉亂局、警隊肩負起維護國家安全使命，又會講述警隊對嚴重危害國安嘅頭目同組織採取嚴厲執法行動，話部分涉及國家安全嘅案件，經法庭審理後已成為「鐵案」。

特刊並收錄國家主席習近平、國務院港澳辦主任夏寶龍就維護國安嘅重要講話，亦有特區官員同法律界人士對國安法實施嘅見解。《警聲》提到國安法實施嘅效果立竿見影，令香港「由亂轉治」邁向「由治及興」嘅新階段，警隊角色不可或缺，形容人員上下一心、勇敢堅毅地「止暴制亂」同打擊危害國安嘅活動。