【Emily】香港大使會訪阿聯酋團 簽30備忘錄

【明報專訊】經民聯立法會議員林健鋒（Jeffrey）早前率領佢有份成立嘅「香港大使會」訪團到阿聯酋，會面當地官員同企業。佢總結此行共簽署30份諒解備忘錄，涵蓋環保、高新科技、運輸等範疇，又引述當地商界有意來港投資發展，已邀請對方7至8月來港交流，並考察大灣區。

訪團本月13至17日到訪阿聯酋迪拜同阿布扎比，獲王室成員接見，並與石油、投資公司及家族辦公室會面。Jeffrey引述當地商界認為本港優勢較新加坡強，但唔熟悉北都、大灣區發展，甚至有人以為香港局勢仍不穩，佢都一一解釋清楚。Jeffrey話「香港大使會」稍後會率團去沙特、埃及等國招商引資。

梁熙率團哈薩克考察 青民計劃訪俄

民建聯梁熙早前亦與多名青年民建聯成員到哈薩克考察，佢同Emily講，此行參觀中石油位於當地嘅油田、輸氣及輸油設施等，又到訪大學同藝術中心。佢話中石油喺哈薩克開採石油，同時確保六成產量於本地銷售，亦興建基建設施，達至平等互惠。梁熙話邀請咗當地大學、中學生年底來港，仲預告青民正計劃率團到俄羅斯交流，但唔會去發生戰爭嘅地區，唔擔心安全問題。