【Emily】李家超打氣 載荷專家候選人亮背影

【明報專訊】中央上年啟動第四批預備航天員選拔工作，首次喺香港選拔載荷專家，本港有10多人通過初選，即將前往北京參與複選。特首李家超噚日喺禮賓府同佢哋會面打氣，感謝佢哋喺歷史時刻挺身而出。政府同李家超facebook噚日都發布會面相片，不過當局做足保密功夫，載荷專家候選人嘅身分相當神秘，全部相片只拍攝佢哋嘅背面，睇到當中有男有女。

李家超同副財政司黃偉綸、創科局長孫東、特首辦主任葉文娟，噚日喺禮賓府會見本港載荷專家候選人。李家超話，本港有10多人通過初選，證明香港喺科研和創新領域人才輩出，又提到參與複選嘅候選人分別來自政府部門、醫管局、大學，仲有其他機構同企業，代表咗香港嘅科研同創新力量，為佢哋感到驕傲，祝願各人一切順利、脫穎而出。

特首仲話，中央首度喺香港選拔載荷專家，代表國家高度重視同肯定本港科技界，認同香港作為國際創新科技中心嘅地位，體現國家關心香港青年發展，並歡迎港人貢獻國家發展。