Emily Online｜海洋公園招「鬼才」加入「嘩鬼大家庭」　增設彈性上班時間 (20:58)

海洋公園今日（5日）話，因應今年萬聖節「哈囉喂2023」活動，展開「全民造鬼」招募，目標喺召集1200名想一展身手嘅「鬼才」，涵蓋表演人員、舞台導演及後台技術人員等加入「嘩鬼大家庭」。網上申請而入圍嘅人士，將會喺呢個月尾至下個月頭獲邀面試，合約期就由今年8月尾至10月尾，獲取錄嘅人士同時可享有一系列嘅員工福利同折扣優惠。

園方話，今年「哈囉喂」將會提供彈性上班時間，無論係朝九晚五嘅上班族、學生定「斜槓族」，都可以喺課餘或其他工作同生活安排之間投入「詭異世界」。海洋公園「哈囉喂星探團」安排喺下個禮拜六（17日）一連兩日，喺尖沙咀The One即場接受報名申請面試，團隊仲會喺現場示範化妝術同「鬼舞」，更有資深「嘩鬼」教練分享扮鬼心得，讓有興趣嘅人士體驗樂趣。

園方強調，就算無同演藝相關經驗嘅新人，只要有熱誠，自覺「鬼魅十足」，有能力將其他人嚇到花容失色，都唔好錯過呢個全港最大型「哈囉喂盛會」咁話。