【Emily】主題車站點解揀金鐘？ 黃鴨設計者暗藏心思

【明報專訊】如果大家返工返學經過金鐘站，一定發現已變咗「期間限定」嘅橡皮鴨主題車站，月台地面、扶手電梯、牆身都有出自荷蘭藝術家霍夫曼之手嘅橡皮鴨公仔，最矚目嘅應該係E出口巨型玻璃天窗貼住嘅鴨仔面。港鐵話橡皮鴨展覽由今個月10號開始，為配合展覽時間，主題車站會維持3星期，提醒市民打卡都要注意安全，到時站內唔同地點都會加派人手維持秩序。

今次鴨仔「游」入港鐵站，橡皮鴨展覽主辦機構AllRightResearve市場部傳訊經理張菁琳同Emily講，橡皮鴨10年後再訪港，霍夫曼同主辦都希望畀到香港市民少少新嘢，而霍夫曼之前嚟香港搭過港鐵，覺得「橡皮鴨主題車站」嘅諗法好有趣，揀金鐘站嘅原因之一，就係呢度離展覽地點添馬公園對出海濱長廊5分鐘路程，公眾由搭港鐵開始，再由月台步行至橡皮鴨所在嘅出口，已經係體驗緊橡皮鴨藝術。