【明報專訊】夏天為大地帶來雨水，仲有打風。近年冧樹意外一籮籮，港鐵噚日話會採取措施減低風暴影響，仲會用先進科技加強監察露天段樹木同風險管理，測試緊喺輕鐵車頂加裝監察系統，配合人工智能平台，蒐集露天段附近樹木生長數據，提升預測樹木可能進入行駛範圍嘅能力，幫樹木管理團隊及早辨識、修剪較高危嘅樹。
港鐵話風季前會派樹木管理團隊加強檢查同修剪露天段嘅樹木，職員已確保阻擋雨水進入車站嘅設備，例如防洪板、沙包等準備就緒。打風期間，港鐵會派維修團隊喺鐵路沿線候命，緊急維修可能受損嘅鐵路設施，同埋清理路軌上嘅塌樹同雜物。
