【Emily】浸大新聞訪問學人 明報兩人入選

【明報專訊】浸大傳理學院噚日宣布，有4名資深傳媒人入選第二屆「新聞工作者訪問學人」計劃，有兩個係本報同事。其中駐廣州記者站主任陳子凌話，過去一直思考係咪要重返校園進修，裝備自己，加上感覺到近年行內變化日新月異，期望緊貼潮流，如了解新媒體或人工智能對新聞行業工作嘅幫助，達至「周身刀，有多幾把刀傍身」嘅目標。

盼「周身刀，有多幾把刀傍身」

另一個係國際組編輯主任洪金法，理科出身嘅佢對文字工作同攝影有濃厚興趣，深信「新聞是歷史的初稿」，新聞工作者嘅工作就係記錄時代，故認為新聞工作者重要嘅特質之一就係知識同見識。佢期望喺計劃中充實自己，增廣見識見聞，協助整個行業同公司發展。

「新聞工作者訪問學人」屬全港首個同類計劃，畀在職新聞工作者提供休假進修機會，獲選者喺2023/24年度會以全職學生身分，旁聽浸大經授課老師核准嘅任何本科或碩士課程科目。我哋同事就揀咗進修4個月，其薪金由計劃支付。另外兩個入選行家為BBC中文部資深記者及編輯伍江川、無綫電視新聞及資訊部助理編輯主任李偉達。