【Emily】上年212宗駁錯污水渠 三成完成修正

【明報專訊】渠務署都有拍宣傳片「雨水污水，不同流不合污」，教育公眾駁錯渠嘅影響，而申訴專員公署過去亦發現，有私樓錯誤接駁至雨水渠個案嚴重延誤跟進，但駁錯污水渠都有類似情况。環境及生態局噚日回覆立法會議員書面質詢，提到上年有212宗駁錯污水渠個案，完成修正嘅個案只有64個，佔大約三成。睇番個案分佈，駁錯渠最多係喺荃灣區，有61宗，但只有18宗完成修正。

荃灣61宗最多 18宗完成修正

喺全年212宗個案中，政府提及有23宗係業主被警告或勸喻後糾正、15宗係業主接到法定修葺或清拆令後糾正、26宗係有關公共污水渠嘅老舊維修保養等問題，已由政府承建商修復；其他個案包括未糾正、處於調查階段或糾正工程仍在進行中。

另外關於維港水質問題，環境局話維港水質管制區水質良好，過去5年全年海水水質指標達標率維持喺90%或以上，平均整體達標率係95%，而2022年整體達標率係93%。政府解釋，達標率下降主要原因係由於夏季受珠江徑流及西南季候風影響，令海水嘅背景無機氮水平偏高所致。