【Emily】青協調查：88%青年自視世界公民

【明報專訊】青年協會青年研究中心成立嘅「青年創研庫」，喺3月29日至4月2日期間，以實地問卷調查方式訪問咗522個15至34歲青少年，了解年輕一代嘅世界視野。創研庫噚日發表研究報告，話約88%受訪青少年視自己係世界公民，約86%受訪者視個人擁有世界視野係重要嘅事；佢哋最關注嘅全球議題頭三位係「全球經濟」、「環境污染」及「戰爭或衝突」，分別有約20％至30%受訪者投選，超越只有約16%至20%成人選擇嘅「公共衛生」、「人權問題」同「政治不穩」等議題。

約40%受訪青少年分別以「留意國際新聞」及「上網搜集更多資訊」，作為提升世界視野嘅方法；另有約40%受訪青少年認為「缺乏資源到其他地方體驗」係培養世界視野最大障礙。

創研庫建議政府考慮以獎學金資助有興趣同成績符合條件嘅本港青年，到包括「一帶一路」沿線國家同地區嘅新興經濟體升學；建議當局設提案平台，畀青年就全球議題構思改善方案，有機會資助佢哋去海內外相關國際組織交流；並建議政府同民間組織定期舉辦各地聞名嘅傳統節慶，啟發港青對唔同地方文化嘅好奇心，長遠促進本港多元文化發展。