【Emily】四成人不回收 民建聯倡全港屋苑設入樽機

【明報專訊】政府最快今年底開始禁止銷售或免費供應即棄塑膠產品，民建聯喺4月20日至5月15日訪問咗429人，發現約40%受訪者喺過去一星期，每日都有用即棄塑膠產品，依次序最常用嘅係膠袋、飲料容器、即棄膠餐具，另有42%受訪者喺過去一個月都無用過回收塑膠嘅設施，主要因為回贈唔吸引、回收地點唔方便等。

雖然市民成日用即棄塑膠產品，但問到係咪支持政府禁止飲食業提供同售賣即棄膠餐具，有66%受訪者都話支持。民建聯認為市民嘅環保意識高，但未做到知行合一，立法會議員陳克勤認為要增加廢塑膠回收率，政府應該按回收情况調整回贈水平，仲要喺全港住宅屋苑放「入樽機」，做到「梗有一部喺左近」，又認為政府應利用創新技術處理廢料回收同循環再用，統籌相關政策，引入更多有志針對環保問題而設立嘅創科企業。