【Emily】三度連任律師會長？ 陳澤銘笑而不語

【明報專訊】律師會噚日舉行周年會員大會，其間舉行儀式，將兩個資深律師胡寶星、周近智，仲有家事法庭法官陳忠基加入律師會榮譽律師名冊，表彰佢哋對法律界同律師界嘅貢獻。

年逾90歲嘅胡寶星係行內有名嘅律師，處理物業買賣嘅胡關李羅律師行，當中嘅「胡」就係佢。周近智就係聖公會首名華人法律顧問。胡曾擔任恆地同新地非執董，周就係長實非執董。至於陳忠基就喺1982年獲律師資格，1995年加入司法機構擔任區域法院法官，2015年起擔任主任家事法庭法官。

另外，律師會早前喺無競爭下改選部分理事，開明派退位。據了解，現任會長陳澤銘（CM，圖）會第三度連任，雖然三度連任過去喺律師會比較少見，但都有彭韻僖開咗先例。Emily先前喺社交場合遇到CM，問佢會唔會連任，佢笑而不語，話遲啲話畀Emily知。根據程序，新一屆律師會月底會開第一次理事會，到時會互選新任會長。