【Emily】中大大豆研究隨「天舟」升空 創香港太空農業實驗先河

【明報專訊】「天舟六號」貨運飛船順利升空，並到達中國太空站「天宮」，今次嘅國家航天任務，原來中大都有份參與。中大卓敏生命科學教授暨農業生物技術國家重點實驗室主任林漢明及其團隊，同華潤科學技術研究院、航天神舟生物科技集團展開合作研究項目，團隊所研究嘅大豆固氮菌菌株「根瘤菌」前日（10日）晚上隨「天舟六號」升空，成為本港首個喺太空做空間搭載實驗嘅農業研究項目。

段崇智及研究團隊赴海南文昌見證

中大校長段崇智同林漢明嘅研究團隊仲去到海南省文昌，見證大豆固氮菌隨「天舟六號」貨運飛船成功升空。段崇智話覺得好振奮，仲講笑話中大嘅科研已經好似嫦娥咁，去到好遠嘅太空，認為今次對中大將來喺國家航天科學同技術發展係好重要嘅第一步。

林漢明就希望可以透過先進嘅科技同中大科研人員力量，用新方法探討糧食安全嘅問題，並將中大過去25年嘅大豆研究向前再推進一步，佢又希望不久將來可以帶大豆種子上太空。講到科研，好多時提到轉化成果嘅問題，佢亦好希望大學科研機構可同企業合作，令科研上完天之後係可以「落地」嘅。