【Emily】穿過仲門畢唔到業？ 朱銘原意係「成功之門」

【明報專訊】著名雕刻家朱銘上月去世，其「太極系列」作品《仲門》豎立於中文大學大學圖書館門前，成為中大本部校園地標，中大刊物《走進中大》噚日就有文章講《仲門》故事。中大一直有個傳說，話學生如果穿過《仲門》就畢唔到業，朱銘喺2006年到中大監督雕塑翻新工程時話，佢整雕塑嘅用意，係想學生明白雕塑係可以親近、接觸和穿越，朱銘當時回應傳聞話：「我刻的時候，用意是成功之門。」中大生如果知道朱銘嘅苦心，仲會唔會相信呢個流言呢？

《仲門》原本叫《門》，喺1987年12月揭幕，豎立中大35年，中大分別喺1998年和2006年，將雕塑所在嘅烽火台嘅石階和平台表面換成麻石。2006年朱銘親臨中大，決定將《門》重新命名為《仲門》，希望賦予一個全新形象，當時佢更為雕塑嘅新名稱親筆題字，墨寶製成牌匾，2007年8月安裝喺烽火台嘅麻石台面上。現時大家只要走上烽火台石階，都可以欣賞到朱銘嘅書法。