【Emily】杭州亞運馬術項目 馬會提供技術支援

【明報專訊】杭州亞運會馬術項目今年9月喺浙江舉辦，香港賽馬會噚日宣布，到時會負責提供技術支援。馬會行政總裁應家柏噚日同亞運會組委會簽署合作備忘錄，馬會將就馬屬動物生物安全、馬匹運輸、馬房管理、獸醫同釘甲服務、場地運作、國際持份者聯絡等六方面提供建議同支持，並喺人手、設備方面提供支援等。

馬會亦會擔任杭州亞運會香港志願者計劃嘅支持機構，為年輕人提供參與亞運會嘅機會。應家柏話，馬會係規模最大嘅世界級賽馬機構之一，憑藉全球公認嘅專業知識同埋經驗、香港「一國兩制」嘅優勢，為內地嘅馬匹運動同相關產業嘅發展作出貢獻。佢仲話，杭州亞運會係國家最重要嘅國際體育盛事之一，馬會將同杭州桐廬馬術中心合作打造最精彩嘅馬術比賽。