【Emily】郭位：城大優秀 原因有3件 臨別在即 稱保健中心翻修圓願

【明報專訊】城市大學校長郭位（圖）將於本月任滿退休，日前佢發布最後一期嘅「校長簡訊」。臨別秋波當然會講吓感受，郭位喺簡訊中提到，校內嘅保健中心已經重新翻修，係佢近年嘅心願，好高興留下印記！佢仲以保健中心做例子，說明城大表現異常優秀嘅主要原因有3個，其中一個係「心件」，即係指保健中心嘅醫生、護士同藥劑師都係仁愛之士，關心每一個人，老師同樣盡心盡責，所以城大過去幾年能取得成功。

心件 軟件 硬件

至於另外兩個城大成功嘅原因，就係硬件同軟件，郭位話，事關保健中心喺同一地點營運逾30年，早排翻新時，將門診同治療區域重新作安排，包括等候區安裝咗落地玻璃窗增加天然採光、優先採用綠色建築做法、加強通風系統等等；而軟件方面都有提升，好似保健中心安裝咗新嘅網上預約時間同電子取籌系統，診所醫生可以電子方式記錄診斷，亦都減少等候時間。

郭位最後就話，雖然希望大家唔使去保健中心，但真係要去嘅話，希望大家了解吓保健中心如此獨特嘅硬件、軟件同埋心件。