【Emily】楊潤雄參觀海南影城景點取經

【明報專訊】政府官員相繼外訪、內訪，文化體育及旅遊局長楊潤雄噚日就結束訪問海南省嘅行程。楊潤雄主管旅遊及文化事務，相比其他官員，佢外訪時就大條道理去參觀「景點」取經。噚日佢就去咗位於海口市嘅馮小剛電影公社，嗰度係一個類似影城嘅景點，有唔同年代嘅電影場景、仿中國城市街區建築。楊潤雄話，公社已成為海南省文化旅遊新地標。

楊潤雄話，內地電影業發展一日千里，一部電影內地票房可去到幾十億，唔少香港電影工作者亦喺內地發展。佢又乘機提到，政府會繼續支持香港電影業，透過電影發展基金推展兩項新措施，分別係「亞洲文化交流電影製作資助計劃」同埋「串流平台內容開發計劃」，支持香港同亞洲團隊合拍電影。

楊潤雄又提及國家《十四五規劃綱要》下，香港要肩負起中外文化藝術交流中心嘅角色，多認識內地同業嘅動向，多做融合交流工作，一齊將作品帶到國際，「說好中國故事」。