【Emily】孫玉菡：先訂量貧指標 再傾減貧目標

【明報專訊】由工聯會立法會議員鄧家彪（右）主持嘅網上節目《理中有我》，最新一集邀請咗勞福局長孫玉菡（左）談精準扶貧。阿彪關注會唔會考慮制訂減貧目標，孫玉菡話今屆扶委會初步識別3個群組，包括長者、單親住戶同劏房戶，現要研究點樣量度貧窮，認為要「多維度量度」，希望年底前喺扶貧會就住用咩量度指標有較確切睇法，訂咗量度指標後，下一步可以傾吓係咪再訂目標。

孫玉菡話過去扶貧工作好着重貧窮線，但貧窮線只睇收入，有好多不足之處，今屆政府就想睇吓點樣切實幫到真正貧困嘅人。至於係咪完全等於內地嗰套精準扶貧，孫話會有佢嘅精髓，唔會完全一樣，但可以吸納內地好嘅方法，「對點、對焦」幫到有需要嘅人。

近期頻頻出訪嘅孫玉菡噚日喺北京展開訪問行程，包括拜會民政部社會救助司司長劉喜堂，同養老服務司副司長李永新，就社會救助政策、長者社區同院舍照顧服務交流，探討融入國家發展大局方向，特別係大灣區城市合作。佢話正跟進安老同康復服務可協作範疇，以應對人口高齡化挑戰。