【Emily】安達臣道倡建石礦公園 設「爆石區」有球場展品

【明報專訊】政府近年發展觀塘安達臣道一帶，噚日喺立法會民政事務委員會上，討論喺安達臣道興建安達臣道石礦場石礦公園，預算工程費用約8.3億元，目標喺3年內完成工程。根據政府向立法會提交嘅文件，石礦公園內會有觀景台、寵物公園、單車公園、露天劇場、單車亭、中央草坪等，另外仲會有歷奇遊樂場、野外定向運動等設施。助理康文署長陸智剛喺會上回應議員提問時，就話石礦公園將會係香港第一個設具有規模嘅野外定向嘅公園，而平時其他公園嘅就相對小型啲。

有單車公園野外定向設施等

陸智剛並解釋，公園內嘅野外定向適合一家大細參與，預計有30個標誌，有部分賽道以樹木做標誌，等家長同小朋友可以去搵樹木。睇番政府文件，仲會將公園劃分為?石區、碎石區、爆石區及砌石區，建築署工程策劃總監馮子峯喺會上就話，「爆石區」內會有籃球場同埋足球場，另外喺更衣室大樓嘅外牆設有展品，介紹打石工人嘅裝備同衣著。