【Emily】共創明Teen學員參觀陳國基官邸「每事問」

【明報專訊】政府搞咗個「共創明『Teen』計劃」，配對基層學童和友師。近期唔少大機構響應，安排學員去參觀考察，而主事嘅政務司長陳國基都要提供服務。佢噚日就安排一班學員，去位於山頂白加道嘅官邸參觀，佢同辦公室同事就當「導賞員」，帶學員認識官邸各「景點」。陳國基話呢班學生求知慾強，問咗好多問題，例如魚池中嘅錦鯉有冇名、花園果樹嘅果實可唔可以食等。

陳國基話，佢特別欣賞學員喺交流環節積極發問，除咗問佢每日幾點起身返工、有冇試過喺官邸泳池游水、係咪做唔到work life balance等「私人」問題，學員對官邸嘅景點都感興趣，而導賞員就解答問題，話錦鯉都無改名，至於果樹係本地原生品種嘅紅皮糙果茶，理論上可以食得嘅。

參觀活動本來分批，但由於噚日下晝天氣惡劣，一批學員未能如期參與，陳國基承諾會喺稍後時間「補辦」一次。