【Emily】陳茂波話經濟復蘇仍在初始階段

【明報專訊】政府推出「開心香港」系列活動，包括搞美食市集等，財政司長陳茂波話，各項數字反映香港經濟復蘇仍在初始階段，力度還需加固，但佢話如果外圍市况冇急劇惡化，憑着一系列支撐內部需求嘅舉措，加上內地嘅貨物進出口持續改善，預料年內本港經濟有望進一步改善，「相信本港的經濟會是一季比一季好，今年比去年好」。

財爺噚日晨早出席喺山頂舉行嘅慈善步行活動，並喺網誌大談「開心香港」活動及經濟預測。佢話不經不覺已踏入5月份，自本港全面恢復與內地及國際通關，訪港旅客大增，市民也更多出外飲食及購物，經濟及社會氣氛持續改善。

財爺話今年首季嘅食肆總收益按年激增82%至275.6億元，即使當中部分升幅源於低基數效應，但以金額計仍然是3年多以來最高水平。同期嘅零售業銷售貨值亦按年上升24%，係自去年12月到今年3月，連續4個月每月高於300億元水平。各項數據都趨向正面，但整體貨物出口仍錄得18.7%跌幅。