【Emily】EQ終於一條線 話立會辦同事病晒

【明報專訊】近期有幾名立法會議員確診新冠病毒，包括民建聯葛珮帆（EQ）。EQ喺4月27日公布自己快測「兩條線」，有食中藥治療，但兩條線久久不退，而且病得好攰，至近兩日先慢慢好轉，噚日仍有鼻塞、周身痠痛同幾聲咳，做快測都仲係兩線，所以要以視像參加民建聯婦女事務委員會主辦嘅「強制舉報虐兒機制立法」圓桌會議，到下午再做快測，話終於等到一條線，打算今日正式復工。

EQ話，佢上月底參加大灣區考察返港後，未返過立法會嘅辦事處，但近日辦事處嘅同事全部都病，有人中咗新冠，有人中咗流感，所以估計本周辦事處都未能完全回復正常工作。

講番個研討會，EQ話過去社會已從多方層面上爭取完善現有機制，但去年仍有千多宗兒童虐待個案，令人感到憂慮同失望。參與嘅副勞工及福利局長何啟明話，政府正全力推進訂立強制舉報虐待兒童個案機制，並爭取於上半年向立法會提交條例草案。