【Emily】跟入息中位數 陪審員加薪7%

【明報專訊】雖然國安法案件未試過設陪審團，不過陪審團制度仍然係刑事司法制度重要一部分。?家陪審員一日津貼930元，行政署同司法機構向立法會財委會提交文件，話考慮到2020年第三季至2022年第三季僱員每月就業收入中位數變動，同埋盡量減低公眾擔任陪審員嘅財政損失，建議加陪審員津貼約7%，去到一日995元，不足一日亦當一日，即係每日加多65元。

證人及專家證人最高津貼都同步建議調升，但幅度稍低，普通證人615元一日，加約6.5%去到655元，專家證人就每日3210元，加2.5%，去到3290元。

司法機構話，預計增加陪審員同證人津貼，每年會增加大約80萬元開支。金額本身每兩年調整一次，今次建議已獲財經事務及庫務局長同意，稍後需要修訂相關法例。