【Emily】拾荒長者九成損手八成傷腳 教會促供治療

【明報專訊】拾荒長者辛勞付出往往被社會忽略，基督教香港信義會社會服務部噚日趁五一勞動節舉辦「拾連」社區回收研究發布會暨同樂日，希望感謝同肯定回收工作長者喺環保行業嘅貢獻，亦想鼓勵社會關注佢哋嘅工作環境同健康問題。同樂日有攤位遊戲，亦有小朋友試推載滿紙皮嘅手推車體驗拾荒。

「拾連」計劃接觸咗北區、油尖旺同土瓜灣逾200名從事社區回收長者，評估資料顯示，拾荒長者喺執整紙皮時經常要用手指綁紮紙皮，又長時間彎曲腰部同運送超重紙品等，導致九成參與計劃嘅長者手指關節有唔同程度變形同繃緊，八成人嘅膝關節出現退化同有腳患問題。

佢哋希望鼓勵各界積極建立回收友善社區，包括建議社福界設立外展長者支援隊，尋找同連結區內做回收長者，加強支援，亦建議為回收者提供針對工作嘅治療服務，紓緩工作導致嘅關節及肌肉勞損。