【Emily】局長外訪產生幾多碳足印？ 環境局：港訂2050前達碳中和

【明報專訊】隨着社會復常，唔少司局長先後外訪。環境及生態局長謝展寰上月中訪問北京見唔同部委，係佢上任以嚟首度外訪。Emily本住求真精神，問吓負責主管環保同可持續發展嘅局長今次外訪會產生幾多碳足印，同埋有無打算購買碳排放額抵消番。

環境局回覆話，今次局長係按主要官員乘坐飛機到外地公幹指引嚟做交通安排，至於飛機係咩等級同產生幾多碳足印，局方無正面回應，只重申香港已訂下2050年前達至碳中和嘅目標。

翻查《政治委任制度官員守則》，司局長作為主要官員去公幹時「可乘坐頭等機位，費用由政府支付」。如果以國泰航空網上碳排放量計算器計算，單人頭等客機來回香港同北京首都機場，會產生0.72噸二氧化碳碳排放量，如果抵消番一人大約47.5元。