【Emily】曾俊華AI試造型 變英雄讚amazing

【明報專訊】前財政司長曾俊華都擁抱人工智能（AI）熱潮，佢嚟緊會為其任職顧問嘅保險公司拍廣告，要度吓造型，公司就用AI Art Generator，即係人工智能圖像生成器，以佢嘅圖片，創作咗唔同款式嘅造型畀佢參考，令佢可以變身超級英雄、高達、悟空都冇難度。曾俊華讚賞創作「好amazing」，話畫功除咗手指位仲有啲瑕疵之外，基本上都算係高水準之作，又話咁多個造型揀，今次都有「選擇困難症」。

曾俊華其實想乘機分享佢對AI嘅看法，佢話有人會話，人類唔使再學畫畫，因為會被AI取代，但佢認為AI都係靠人類「指導」，要「觀摩」人類過去嘅作品之後，先至能夠創作出一幅新嘅藝術品。佢認為AI如果要畫出一幅有深度、有水準、有內涵嘅作品，仍然要有好嘅人類「導師」先至得。因此，佢認為人類只要保持創造力、堅持創新，AI有排都未贏到人類。