經濟
叙福樓黃傑龍用ChatGPT畫年報封面
【明報專訊】上市公司自己設計年報封面或由高層親筆撰寫內容，時有所聞，係唔係慳水慳力，小琴真係唔知，不過就好肯定可建立個人嘅特色同風格。叙福樓（1978）主席兼行政總裁黃傑龍就索性自己設計年報封面（圖），擺明「慳家」同順道sell下信息。佢已喺中期業績報告封面手寫標明「上半年盈利下降，成本控制很重要（包括封面設計）」後，意猷未盡，再玩潮流最興嘅ChatGPT，喺年報封面用咗20秒畫咗隻牛，標明「一頭強壯的公牛高聳而立，自豪地展示着一個帶有數字1978的牌，這是對一個充滿成功和繁榮的年份的提醒。」
佢又起題話：「善用科技改善效率很重要」，仲喺個人嘅facebook補充：「?家科技真係好快，所以我們各分店都有幾部執碗碟機械人、全自動洗碗乾碗機、牛角有日本進口的刷網機等等，我?家自己每天工作都會用到ChatGPT，好方便」。黃總咁慳法一定夠晒吸睛，但若上市公司有樣學樣，間間都自行設計年報封面，唔知對財經印刷商又有幾大影響呢？
